Iwwersischt:
Die Stuwwe (Hotel)
Die Wertschaft  (Das Lokal)
Die Leut  (Team)
Wäi´s frojer wuer  (Chronik)

Üwwerall uff de welt werd englisch geschwetzt - Üwwerall? Naa, in e poar klaane Derfer in Hesse werd noch so schee braat hessisch gebabbelt, zum Beispill bei uus in Hiddegesees. Des iss so e rischdisch klaa Derfsche mit Kersch, Parrer, Bojermaaster, e poar Wertschafte, unn em ganze Haufe lustische Leut, ja - unn aach o poar Immgewende, sonst wär jo nix luus.

Die meisde hompädschseide uff de welt sinn uff englisch. Wie solle dann da die originale aale Hesse die Welt noch verschtehe? Deshalbwesche hab isch misch emall drohgesetzt, und hunn e mal e poar Werder uffgeschriwwe - in unserner Ronneburjer Mundart - wie mir uns des so vorschdelle. Wer´s nett ganz kapiern duht, kann sich im Indernett uff folschende Seide Üwwersetzungshilfe hole:
Hessisch für Oofängää     Hessisch  für  Anfänger  und  Babbel - Fans!!
Hessisch Gebabbel    Sprachtest  für  geübte  Hessen
Des hessisch, was hier so geschriwwe iss, iss owerhessisch, obwohl mir eischentlich kaa Owerhesse soi, awwer Rhein - Main - Hessisch gibt´s nett, dess iss von deene Städter vermuschelt worn, unn is eher hochdeutsch, als hessisch. So babbelt de Heinz Schenk, Mundstuhl, odder de Maddin Schneider. Unser Geeschend iss zwischem Vogelsbersch, Spessart un de Reehn (Rhoen). Zwansisch Killomeder von Frankfort ewegg, und fuffzeeh von Haaane (Hanau). Unser annern Nachberschtädte sinn Gellehause (Gelnhausen) unn Boiringe (Büdingen). Soo rischdisch schee mit Fachwerk, aale Stadtmauern, Marktpletz mit dicke Beehm, scheeene Kaffees unn - Was verzehl isch Ihne dann? - komme se doch aafach emall vorbei im Kinzischtal, es werd Ihne gefalle! Awwer so ganz braaat schwetze mer heut aach nett mehr.

Die Stuwwe
1989 hawwe mer die ganze Stuwwe neu gemacht, alles aale abgerobbt und ordentlich nue uffgebaut. Die 14 Stuwwe hawwe all Fänseeh, Dellefohn, Dusche, Toilette, Föhn für´n Kopp, en scheene Disch zum Schreiwe, manchmal en Balgong, Eins hat sogar noch e klaa Doppelzimmer newedraa, do kenne se mal mit zwaa Kinner mehr komme, die hawwe dann ihr eischen Stubb -- unn Sie hawwe Ihr Ruh. Wannse nachts Dorscht hawwe, sinn kühle Trinkereje doo, odder aach e Daafel Schoggelaad mit Niss.  Mojens beim Frühstück duhn mer alles uff so e scheh Büffet Schdelle, da fehlt´s an nix, Wurscht vom Chef selwer gemacht, selwer gebacke Brot unn frische Weck - aach Sonndachs, Schileeh (Marmelade), Käs, Madde (Quark), Wann se wolle, könne se aach emoll noch em Wedder bei uns gugge, awwer meistens scheint die Sonn in Hessen.

Die Wertschaft
Hier  isses so rischdisch gemütlich, awends am Stammdisch bei em Äppelwoi unn em Handkäs mal so e bissi üwwer die Welt geredt, odder mit de Fraa an em scheene Disch emoll so rischdisch was gudes esse. Sie müsse bei uns übrischens nett nur hessisch esse, unser Küch iss eischndlisch von alle Eiflüss aus de Weit Welt gepräscht. Des macht die Eischenart von de Hesse aus, weil des ja immer schon e Land der Durchreisende gewese iss. Mir hawwe Platz für Tagunge, Hochzeide, Geburtsdaache, für 20, 30, 50, odder aach emall für 100 Leut, do werd´s dann so rischdisch scheeh. Un da mache mer dann so verschiedene Büffets un aach so vornehme Esse, wie mer im Fänseeh immer so sieht. Wann se mal en Termin brauche, kommes se mal vorbei, mir mache Ihne mal e Angebot, aafach so.  Also wann se emall bei uns esse duhn, wern se merke, dass die Speisekart vollgestoppt iss mit allem, was gern gegesse werd. Weil die Hesse gern Esse - unn liewer immer was Gutes als dauernd was Schlechtes, unn liewer immer e bissi mehr als dauernd zu wenisch. Unn bei uns gilt de aale Satz - Solang wie mers hawwe, hawwe mers, unn wann´s all iss, isses all.  Noja. Unser Kesch bruzzele alles zusamme, was se wolle, mache scheene Eis un Nachdisch, Salaade, Vorschpeise, mordz Flaaschbrocke uffem Deller, scheene Hüttegesäßer Kadoffel, unn Griee Soß, wie se de aale Goethe gern gegesse hawwe soll. Mir mache aach Saisong - Esse, also im Winder Schlachtfestwoche, so rischdisch mit selwergemacht Worscht unn Schinke,  im Februar mache mer Aisenwoche, am Fassenacht gibt´s   Rollmepps unn Krebbel. Im Juni Spargel, Erwenn (Erdbeeren), Pfifferling bis es aam uhres werd, Staapilze, zwischedorsch aachemoll e Nudelwoch odder e Fischwoch, wannse hochdeutsch leese kenne, gugge se mol uff de Aktuellseite, do steht´s e bissi ordentlicher uffgeschriwwe.

Die Leut
Also die Chefs sinn de Otto, dess iss de Metzgermeister, und de Reiner, de Küchemeister. Die Ria, iss die Owerscheffin, dann sinn die zwaa Deschder Moni un´s Elke aach noch doo. In de Kisch duht de Reiner koche, mit de Lehrbuwe.  In de Kisch bei deene Schdoiwe - Eser,  do werd alsemal ganz scheh was sesamme geriehrt, glaaweses mehr, awwer schmecke duht´s immer. Beim Spoile hilft die Marie unn aach emoll de Michael, unn die Edelgard. Beim Zappe iss de Carsten,  em Kurtsche seiner,  und de Kevin, de Moni iehrn,  gut debei, obwuul se alsemol e bissi schnoiwisch sinn. Bediene duhn die Sylvia, die Roswitha, die Moni unn die Elke. Die Däjern mache  aam manchmol ganz schieh se schaffe.

Wäis frojer wuer Frojehr wuer alles schinner, hunn se immer gesaat. Ohne Maschine unn Abberate gong´s aach. Awwer isch bin froh, dass isch ehwe uff de Welt bin un nett früher, wie´s noch nix gewwe hat. Unser Wertschaft iss 1761 zum erschdemoll erwähnt worn, so aus deere Zeit iss aach unser Haus im Kern. De erschde Wert woar de Konrad Zinkhahn, der hoatt kaa Kienn kräit, do huett er soim Schwager Heinrich Reidel die Wertschaft gewwe. Der hoatt allerhand oohgeschafft, en Schpiehbrenner woar dos näit. Der huett die Wertschaft  dann aach ganz schee in die Reih geschafft, Postkarte gedruckt, en Saal ausgebaut, mit Danzburrem, Gestrische Lemberie, scheene Dischdecke.

   Do hunn se immer noch Koih un Gäul gehabt, Landwertschaft hatt noch goldene Boden gehabt. Jeed Juer hoatt mer e poar Säu fett gemoocht.  Später hatt dann die Dochder vom Reidel, die "Zinkhans Bette"  mit ihrm Mann Georg Erdt (aus de owere Langgasse) die Wertschaft weidergemacht. Däi zwaa hadde finf  Buwe unn aa Meedsche. De Otto  (senior) iss dann Metzger geworrn unn hatt Maaster gemacht. Er hatt dann die erscht Metzgerei von Hiddegesäß uffgemacht unn mit seine Fraa Dortche  (Dorothea Meinhardt) die Wertschaft weidergeführt. In de fuffzischer Johrn wohr dann im Saal e Kino, des hoat de Kino - Ernst gemaacht, do soi die Leut von de ganz Geeschend komme unn hunn Kino geguckt. Un weils im Winder su kaald woar, musste die Leut aach en Brocke Holz mitbrenge, dass de Saal worm worn iss. Im Kinno soi dann aach die leute emol haamgerufe worn, sem Beischpill wann die Muck Freckel gemoocht hoatt. Vom Otto seine zwaa Buwe, Otto junior  unn de Kurt, hatt de Otto die Wertschaft dann später gekrischt.Se sinn alle zwaa Metzjermaaster geworrn unn schaffe heut noch feste. De Otto (jun) hatt dann 1961 die Ria vo Hutten aus em Berschwingl geheirat. Däi hunn sich doo kennegelernt, weil se inner Wertschaft kellneriert hat. Do hatt er sich gesaat. Däi nomm ich mit haam. So wors dann aach.